Sad

khumaar-e-gham hai, mehakti fiza men jeetay hain
teray khayal ki aab o hava men jeetay hain..

firaq-e-yaar me saanson ko rokey rakhtay hain
har ek lamha utarti qaza men jeetay hain..

na baat poori huee thi ke raat toot gae
adhoorey khaab ki aadhi saza men jeetay hain..

tumhari baaton men koyee masiha basta hai
hasin labon sey barasti shafa mein jeetay hain....!

Teri Mehfil Se Uthkar Ishq Ke Maaron Pe Kya Guzri
Mukhalif Ik Jahaan Tha Jaane Bicharoon Pe Kya Guzri

Sahar Ko Rukhsat-E-Bimaar-E-Furqat Dekhne Waalo
Kisi Ne Ye Bhi Dekha Raat Bhar Taaron Pe Kya Guzri

Suna Hai Zindegi Viraniyoun Ne Luut Li Milakar
Na Jaane Zindegi Ke Naaz Bardaroon Pe Kya Guzri

Hansi Aai To Hai Bekaif Si Lekin Khuda Jaane
Mujhe Masruur Paakar Mere Ghamkharoon Pe Kya Guzri

Asir-E-Gam To Jaan Dekar Rihaai Paa Gaya Lekin
Kisi Ko Kya Khabar Zindaan Ki Divaron Pe Kya Guzri....!

hazoor-e-yaar men harf iltija kay rakhay thay
chiragh saamnay jesay hawa kay rakhay thay

bus ik ashk-e-nadaamat nay saaf kar daalay
woh sab hisaab jo hum nay utha rakhay thay

tumhi nay paaon na rakha wagarna wasl ki shab
zameen pay hum nay sitaray bichha kay rakhay thay

bikhar rahay thay so hum nay utha liay khud he
gulab jo teri khatir saja kay rakhay thay

hawa kay pehlay hi jhonkay say haar maan gaey
wohi chiragh jo hum nay bachaa kay rakhay thay

mita saki na unhain roz o shab ki barish bhi
dilon men naqsh jo rang-e-hina kay rakhay thay

hasool-e-manzil-e-duniya kuch aisa kaam na tha
magar jo raah men pathar ana kay rakhay thay...!

naye safar men abhi aik nuqs baqi hai
jo shakhs sath nhi uska aks baqi hai

ghata uthi hai par toot kar nhi barsi
hawa chali hai magar phir bhi habs baqi hai

ulat plat gaee duniya woh zalzalay aaey
magar kharaba-e-dil men wo shakhs baqi hai

fraz aaey ho tum ab rafiq-e-shab ko liay
keh doar-e-jaam na hangaam-e-raqs baqi hai...!

Wohi BeSimt Sa Rasta, Mohabbat Hamsafar Meri
Sarabon Ka Wohi Dhoka, Mohabbat Hamsafar Meri

Ghubaar-e-Raah Bhi Kuch Duur Tak He Sath Chalta Hai
Wohi Ek Main, Wohi Tanha Mohabbat Hamsafar Meri

Ye Lamhon Ki Nahi Hai Ye To Sadyon Ki Musaafat Hai
Kisi Ki Yaad Ka Sehra Mohabbat Hamsafar Meri

Koi Kashti Nahi Hai Jo Humain Uss Paar Le Jaye
Bhanwar, Biphra Hua Darya, Mohabbat Hamsafar Meri

Wohi Her Waqt Sochon Per Kisi Ki Yaad Ka Pehra
Wohi Din Raat Ka Jalna Mohabbat Hamsafar Meri

Yahan Had-e-Nazar Tak Bas Andheray He Andheray Hain
Na Wo Jugno, Na Wo Taara, Mohabbat Hamsafar Meri...!

Suraag de ga kaheen ja k maah o saal mein tu
Kahan rahe ga mere koza-e-khayal mein tu

Parayi dhoop se aangan ki teergi achi
Ulajh raha hai yeh kis roshni k jaal mein tu

Tujhe khaber nahin urti hai khaak-e-jaan kaise
Ghira nahin kisi andisha-e-zawal mein tu

Main dekhta hon lakeeron ki sarhadon mein tujhe
Likha hua hai mere dast-e-kamal mein tu

Tujhe main mang raha hon yeh kis bahane se
Chupa hua hai meri khwahish-e-sawal mein tu

Kisi ki ankh se khwabon ki kirchian chun ker
Ab aik umer se baitha hai kis malaal mein tu

Kahan gaya tere andar ka khud parast Zafer
Bikher gaya hai kisi k jamal mein tu...!

Yehi wada lia tha na
Hamesha khush hi rehna hai
Lo dekho! dekh lo aa k
Meri ankho ko dekho tum
Ye kitni shokh lagti hain
Mere honton ko dekho tum
Hamesha muskurate hain
Koi bhi ghum agar aya
Usay hans kr saha mein ne
Mere chehray ko dekho tum
Hemesha pur'sakun ho ga
Kia tha mein ne jo tum se
Wo wada kr dia pura
Mgr ik baat hai pyare
Kabhi jo waqt mil jaye
To meri shayari perhna
Tumhe mehsoos to ho ga
Kahin talkhi bhara lehja
Kahin pe sard sa lehja
Kahin pe drd ki jheelein
Kahin lehjay ki karhwahat
SUNO!
Mein khush to hun lekin
Mera her lafz rota hai...!

ye musafataiN , raah-e-ishq meiN
kon shahr-e-jaaN ki nazar karey
kissey shouq tanhaa safar karey
karey shahr-e-furqat ki arzoo
kon dasht-e-hijraaN ko ghar karey
in raastoN par chalaa kabhii
merey saath ban ke wo humsafar
jissey samjhaa shareek-e-reh guzar
sar-e-raah wo kisi moR par
badley gaa manzil , thii kyaa khabar
mujhey faslon ki fikr nahi
merey ru-ba-ru merey khowab heiN
wo jo manzileiN heiN dhuwaaN dhuwaaN
ye jo be-nishaaN se heiN raastey
merey waastey ye azaab heiN
ab uss ke aur merey darmiyaaN
haail anaa ke mizaaj heiN
ussey phir se milney ki chah meiN
ab aur chalna muhaal hai
kisey tera itnaa khayaal hai?
kaha kon tera hai muntazir?
merey dil ka mujhsey sawaal hai?…
meri chahton ka ye haal hai
jo merey junooN ka arooj thaa
wohi hosloN ka zawaal hai
jo merey liye tha khush kabhii
wo ab baais-e-malaal hai
meri be bassi bhi kamaal hai
na hi uss se milney ki justujoo

na hi wapsi ka khayaal ha...!

abhi jugnoo nahin rothay
abhi aansoo nahin tootay
abhi soraj nahin jaaga
abhi taray nahin dobay
abhi mehtab baqi hay
abhi aik khawab baqi hay

abhi manzil nahin aai
abhi rasta nahin tehra
abhi jangal nahin guzra
abhi dariya nahin utra
abhi gardaab baqi hay
abhi aik khawab baqi hay

abhi tofan nahin tehra
abhi aankhon main jal thal hay
abhi seenay main halchal hay
abhi khirki main barish hay
abhi kamray main badal hay
abhi barfab baqi hay
abhi aik khawab baqi hay

abhi qissa adhora hay
abhi pori kahani hay
abhi sara burhapa hay
abhi aadhi jawani hay
abhi us paar jana hay
abhi jheelon main pani hay
abhi rasty main daldal hay
abhi payab baqi hay
abhi aik khawab baqi hay
abhi aik khawab baqi hay.....!!!