Search

Hua hai haal yeh barish ki meherbaani se
Zameen k zakham haray ho gaye hain paani se

Dhale hain ashak shab e ghum bari rawani se
charagh ham ne jalaye hain iskey paani se

Na kaam aayi meri jurrat e lab-e-izhaar
Woh badgumaan hi hua aur khushbayani se

Main chahta hun tumhara bharam rahe qayam
Nikaal do mere kirdaar ko kahani se

Mujhe bhi chehra shinasi ka agaya hai hunar
Mila kamaal ye dushman ki meherbani se

Kisi se kuch na kaha aur keh diya sab kuch
Zuban ka kaam liya maine be zubaani se

Abhi zameen se nahi rabta mera AIJAAZ
Guzar raha hoon abhi daur-e-asmaani se

Sochon pe gham ki shaal ha, tum kion chalay gaye ?
Her simt aik jaal hai, tum kion chalay gaye ?

Sab pochtay hein tark-e-marasim k waqiyat !
Kis ko mera khyal hai ? tum kion chalay gaye ?

Taza tamaam zakhm baharon ne ker diye !
Her phool ka sawal hai, tum kion chalay gaye ?

Hasna to khair apna muqadar na tha kabhi !
Rona bhi ab mohal hai, tum kion chalay gaye ?

Tum ne to jatay jatay mulakaat tak na ki !
Ab tak yehi malaal hai, tum kion chalay gaye ?

Is hijar ne to chean liye hein apny hawaas !
Paglon sa apna haal hai, tum kion chalay gaye ?

Wasiq main kis tarha se uthaon dukhoon k bojh ?
Sara badan nidhaal hai, tum kion chalay gaye ?

Waqt ki taiz rawi dekh ke deer jatey hain
Log jetey hain kuch is tarah ke mar jatey hain

Zindagaani teri azmat ko badhane wale
Muskuratay hue maqtal se guzar jatey hain

Bazm e yaraan ho ke dasht e shab e tanhai ho
Zakhm bharne pe jab atey hain to bhar jatey hain

Yeh shab o roz bhi auraq e pareshan ki tarah
Baar ha waqt ki aandhi main bikhar jatey hain

Kitni yaadon se ulajhti hai meri tanhai
Kitne toofaan mere sar se guzar jatey hain

Door reh ker bhi kabhi shikwa e doori na raha
Aap hi aap hain jis simt jidhar jatey hain

Waqt nasaaz hai behtar hai ke ab lout chalain
Shaam hote hi parindey bhi to ghar jatey hain