Search

Yeh hade na toor dena, mairay dairay mein rehna
mujhay apnay dil mein rakhna, mairay hafzay mein rehna

mairay lams mein samana, meri khushboon mein basna
meri guftagu mein hona, mairay zoaq mein rehna

mera hukum khud sunana, meri mohar khud lagana
mairay mashwaron mein hona, mairay faislay mein rehna

kabhi dhoop kay safar mein mera sath chhor jana
kabhi mera aks ban kar mairay aaiine mein rehna

kabhi manzlon ki soorat meri dustarus say bahar
kabhi sang mail ban kar mairay rastay mein rehna

gum shudah mohabbat ke khwaaboN ki tarah hai
woh rooh ke sehraa mein saraabon ki tarah hai

woh zeest kay maktab meiN nisaaboN ki tarah hai
paRhta hooN usay roz kitaaboN ki tarah hai

ab un say khayaaloN meiN hi ho jaati heiN baateN
go beech meiN parda sa hijaaboN ki tarah hai

us shakhs kay lehjay meiN sheeshe ki khanak hai
rag rag meiN utarta hai sharaaboN ki tarah hai

us shakhs kay paikar meiN hai shaakhoN ki lachak si
us shakhs ka chehraa bhi gulaaboN ki tarah hai

jo wasl ki raatoN meiN hai ik maah-e-munawwar
furqat meiN wohi shakhs azaboon ki tarah hai

Hazoor-e-Yaar mein harf ILTIJAA kay rakhay thay,
Charaagh saamnay jaisay hawa kay rakhay thay,

Bas ik ashk-e-Nadaamat se saaf ker dalay,
Wo sab hisaab jo ham ne Utha kay rakhay thay,

Tum hee nay Paon na rakha,warna wasal kee Shab,
Zameen pe ham ne sitaray bicha kay rakhay thay,

Hawa kay pehlay hee jhonkay say haar maan gaey,
Wohi charaagh jo ham ne bacha kay rakhay thay,

HASOOL-E-MANZIL-E-DUNYAA KUCH AISA KAAM NA THA,
MAGER JO RAH MEIN PATHAR "ANAA" KAY RAKHAY THAY.

safar mein raah ke aashob se na darr jaana
miley jo aag ka darya to paar kar jaana

ye ik ishaara hai aafaat e nagahani ka
kissi jagah se parindoN ka kooch kar jaana

ye inteqam hai dasht e bala se baadal ka
samandaroN pe baraste huay guzar jaana

tumhaara qurb bhi doori ka istaara hai
ke jaise chand ka tallab mein uttar jaana

hum apne ishq ki ab aur kya shahadat deiN
hameN hamaare raqeebon ne motabar jana

mere yaqeen ko bara bad-gumaan kar k gaya
duaa e neem shabi tera be-asar jaana

hamaare dam se hi aawargi e shab thi hameiN
ajeeb lagta hai ab shaam hi se ghar jaana

zamaana beet gaya tark e ishq ko "Tishna"
magar gaya na hamaara idhar udhar jaana !

woh khaloos tha ke khumar tha
woh janoon tha ke saraab tha
mujhey sochney mein zamana laga
mujhey manzilon ne bhula diya
mujhey jis masiha pe maan tha
mujhey us ne sooli charha diya

kai humsafar kai rehguzaR
mujhey rastey mein miley magaR
meri tishnagi kuch or hai
meri justajoo koi or hai

woh jo roshni ki tarha barheY
magar ansuon mei sama sakeY

jo subha ki pehli kiran bane
mujhey us wafa ki talaash hai

magar es jahan-e-kharab meiN
yahan khowishoN ke saraab meiN
mujhey kaun de aise wafa
mein kahan se laoon woh wafa
inhi uljhanoN meiN ghiri huwi
yehi sochti mein chali gaie

Mujhe teri mohabbat mein kho jaane do
Har lamha mar ke aaj phir jee jaane do

Isse mahobbat ne dil ko aaj phir dhadkaya hai
Mujhe ishq ki baaho mein so jaane do

Tadap ki aag hai judaai ki baahon mein
Mujhe aaj es mohabbat se mil jaane do

Meri saans chalti hai tere naam ki aahat pe
Mujh benaam ko es naam mein kho jaane do

Kasam tujhe chalne wali hawaon ki mehboob
Mujhe es mohabbat ki aag mein jal jaane do.

Zulam seh kar bhi samajhta hoon k tu mera hai
Mairay dushman teray chehray pay lahoo mera hai

Subh e dam shehar ki shorish teray dum say ho gi
Raat kay pichlay pehar alam e hoo mera hai

Meray haathon mein chupay zakham say pehchaan mujhay
Teray daaman pay bhi ehsaan e rafoo mera hai

Ghir gaya hoon talatum mein bhi zindaan ke tarha
Halqa e mouj e rawaan toq e galoo mera hai

Dhoop chhaaon ki yeh rutt dil mein thehar janay day
Aks tera hai to sayaa lab e joo mera hai

Pathron say hai mohabbat mujhay youn bhi mohsin
Sungdil shehar mein aik aaina roo maira hai ....

Teri saanson mein gulaabon si mehak lagti hai
Husun jis rung mein ho teri jhalak lagti hai

Shaam hotay hi nigaahon mein uter aatay ho
Dil ki dherkan teray pairon ki dhamak lagti hai

es liye phool main collar mein saja layta hoon
es ki khushboo teray aanchal ki mehak lagti hai

Kisi baarish k barastay hi jo ghar aati hai
Teri aankhon mein wo rangon ki dhanak lagti hai

es hi liye to main chand k husun ka garweedah hoon
es k paikar mein teri aankhon ki chamak lagti hai

Jaanay kiun wo meri aankhon ko bhala lagta hai
Jis k chehray pay zara teri jhalak lagti hai.

Muhabbat kay safar mein koi rasta nahi deta

Zameen wakif nahin banti falak saya nahi daita

Khushi aur dukh kay mosam sab kay apney hotey hain

kisi ko apne hisay ka koi lamha nahi deta

Udasi jis k dil mein ho neend us ki urti hai

kisi ko apni ankhon say koi sapna nhi daita

uthaana khud he parta hai thaka toota badan apna

keh jab tak saans chalti ha koi kandha nhi daita