Search

ik Anchal say bandha hai sab kuch
ik tasweer
aur tasveer pay bheegay huay hont
ik sandal ki pencil
ik bay rabt sa ukhra huwa khat
ik adad card
jis ko choonay say teri yaad chali aati hai
jis say manoos duaoon ki mehak ati hai
kisi gumnam say shair ka adhora misra
ik pazaib say bichra huwa ujla mooti
ik murjhaye hoi zard chameli ki kalli
jis main ab bhi teri zulfon kay bhanwar liptay hain
ik boseeda paper
jis k konay pay likha naam abhi taza hai
sharbati kanch ki totti hui nazuk chorri
ik toota huwa halka sa gulabi naakhun
ik bosida sa tissue paper bhi
jis pay mehkay huay ashkon k nishaan zinda hain
yehi dolat hai yehi kuch hai asaasa mera
ik anchal say bandha hai sab kuch
ik bheegay huay anchal say bandha hai sab kuch

Jab Tanhayi Raqs Karti Hai
Jab Waqt Tham Sa Jata Hai
Jab Wahshat Bay Libas Honay Lagti Hai
Jab Naghmagi Bhi Shor Bannay Lagti Hai
Jab Unsiat Bhi Aziat Ban Jati Hai
Jab Khawb, Azaab Lagnay Lagtay Hai
Jab Ihsas Kay Samandar Ka
Har Moti Toot Toot Jata Hai
Jab Mout ,zidagi Ban Jati Hai
Aur Zindagi,mout Ban Jati Hai
Tab Aisay Main Jana

Teri Yaad Aur Bhi Stati Hai

teray paas aane ko ji chahta hai
naye zakhm khanay ko ji chahta hai

idhar aaye shayad vo mauj-e-tarannum
Ghazal gungunane ko ji chahta hai

zamana mera aazmaya hua hai
tujhe azmane ko ji chahta hai

vohi bat reh reh k yaad aa rehi hai
jise bhul jaane ko ji chahta hai

laboon par mere khilta hai tabassum
jab aansu bahaane ko ji chahta hai

kai martaba dil pe bijli giri hai
magar muskurane ko ji chahta hai

takalluf na kar aaj barq-e-tajali
nasheman jalaane ko ji chahta hai

ruKh-e-zindagi se naqab ulaT kar
haqiqat dikhane ko ji chahta hai

Mit gaya hun mujh ko mita rehnay do
Meray jazbat k sholon ko bujha rehnay do

Dard sehnay ki ho gai hai ab aadat mujh ko
Meray rastay hoe zakhmon ko haraa rehnay do

Ab to tabeer ki hasrat hi nahi hai mujh ko
Meri ankhon mein mera khawab chupa rehnay do

Muskurahat pe mera haq he nahe hai yaaro
Meray honton say tabassum ko khafa rehnay do

Dil jo toota hai to ankhein na chalak jayen
Aaj ankhon ko in ashkon say bhara rehnay do... .

jaane kyun wo saanso ki dor tootne nahi deta
bas do kadam aur chalne ka waasta dekar mujhe rukne nahi deta

baat kehta hai wo mujhse hans hans kar jee lene ki
ajeeb shakhs hai mujhko chain se rone nahi deta

aaj hausla deta hai mujhe chand sitaro ko chhu lene ka
wo pyara sa chehra mujhe toot kar bikharne nahi deta

shayad jaanta hai wo bhi in aankhon men aansuo ka sailaab hai
jaane kyun phir bhi wo in aansuo ko girne nahi deta

mujhse kehta hai, main to mar jaunga tumhare bina
main zinda hun ab tak ke wo mujhe marna nahi deta

phir se mausam bahaaron ka aane ko hai
phir se rangeen zamana badal jayega
ab ke bazm charaGhoon sajaa lenge ham
ye bhi araman dil ka nikel jayega

aap kar de jo mujh pe nigaah-e-karam
meri ulfat ka reh jayega kuch bharam
ye fasana to mera rahegaa yahin
sirf unvan us ka badal jayega

pheeki pheeki si kyu sham-e-maiKhana hai
lutf-e-saaqii bhi kam Khali paimana hai
apni nazaron se hi kuch pila dijiye
rang mahafil ka Khud hi badal jaayegaa

mere mitne ka un ko zara Gham nahi
zulf bhi un ki ai dost barham nahi
apne hone na hone se hota hai kya
kaam duniyaa kaa yuu hi to chal jayegaa

aap ne dil jo Zahid ka tora to kya
aap ne us ki duniyaa ko chora to kya
aap itane to aaKhir pareshaan na hon
vo sambhalte sambhalte sambhal jayega

jo dil ne kahi lab pe kahaan aai hai dekho
ab mahafil-e-yara me bhi tanhai hai dekho

phuulon se havaa bhi kabhi ghabrai hai dekho
Ghunchoon se bhi shabanam kabhi katraai hai dekho

ab zauq-e-talab vajah-e-junoon Thair gayaa hai
or arz-e-vafaa baais-e-rusvaai hai dekho

Gam apne hi ashkoon ka Kharidar hoa hai
dil apni hi halat ka tamashai hai dekho

Khamoshi Khud apni sadaa ho aisa bhi ho sakta hai
sanata hi gounj raha ho aisa bhi ho sakta hai

mera mazi mujh se bichhar kar kya jaane kis haal me hai
meri tarah wo bhi tanha ho aisa bhi ho sakta hai

sahara sahara kab tak main Dhondoun ulfat ka ek aalam
aalam aalam ik sahara ho aisa bhi ho sakta hai

ahl tuufaan soch rahe hain saahil Dooba jata hai
Khud un ka dil Doob raha ho aisa bhi ho sakta hai

apni he rawani men behta nazar aata hai
yeh shehar bulandi say darya nazar aata hai


deta hai koi apnay daaman ki hawa isko
shola sa meray dil men jalta nazar aata hai


us haath ka tohfa tha ik daagh meray dil par
wo daagh bhi ab lekin jata nazar aata hai


aankhon kay muqabil hai kesa yeh ajab manzar
sehra to nhi hai lekin sehra nazar aata hai


ik shakal see banti hai her shab meri neendon men
ik phool sa khowaboon men khilta nazar aata hai


aankhon nay nhi dekhi us jism ki ranaie
yeh chaar taraf jis ka saya nazar aata hai


darya ko kinaray say kya dekhtay rehtay ho
ander say kabhi dekho kesa nazar aata hai